تجارب التقديم - تجربة الطالب عمر رمضان الايجابية مع التقديم للكليات العسكرية

----------------------------------------------

اللي حصل ان كان نفسي ادخل حربيه او شرطه ابقي ظابط بمعني اصح حتي كان الناس بتقول يعني علي حد كلامهم اني شكلي ظابط الله اعلم بقي ،،، المهم قدمت بعد ثانوي عام وكنت جايب مجموع 94.5% قدمت حربيه وشرطه مع بعض ومتقبلتش ف حربيه وظلعت طبي ومتقبلتش ف شرطه وطلعت طبي ،، زعلت جدا ودخلت كليه الالسن غصب عني ورضيت بالامر الواقع والناس قالتلي اكيد خير قولتلهم لا مش خير ومكنتش اعرف انه فعلا هيبقي خير ... قضيت سنه ف السن وبعد سنه قدمت حربيه للمره التانيه وبرضو طلعت طبي ... كده بقي مرتين حربيه ومره شرطه ... كملت زي مانا ف كليه الالسن وبعد ماخلصت سنه تانيه قدمت حربيه للمره التالته بس مكنتش اعرف انه مينفعليش تقديم المرادي لان مسموحلك تقدم سنتين ورا بعض بس جهزت ورقي وطلع عيني ووقفت طوابير سوا ف السجل المدني او كتابه ملف او طوابير ف الكليه وانا بسلم الملف الظابط قبله وبالصدفه قالي ايه ده انت مينفعلكش تقدم انت ثانوي عام 2012 اخر سنه ليك تقدم كانت السنه لللي فاتت وقعد يقولي معلش السن كويسه وايه اللي يرميك لوجع القلب وبتاع المهم انا زعلت اوووووي وكده بقي 3 مرات حربيه ومره شرطه ... كملت ف كليتي وخلصت علي خير وجبت تقدير جيد .. خلصت كالعاده ملاقتش شغل مره اشتغل ف سوبر ماركت ومره كول سنتر لحد ما اعلان التخصصات نزلت بتاعه شرطه وكانت المفاجئه ان قسمي طلبوه كانت مغامره كبيره اني اقدم ومكنتش حاطط امل بس قدمت وغامرت للمره الاخيره بعد راي امي وابويا ... بس المرادي كانت غير كل مره كنت قبل اي اختبار اجيب ورق واذاكره وادور ع النت عن ايه الاختبار ده واعمل فيه ايه بالظبط حتي الطبي قعدت اشوف فيا ايه واعالجه بمعني اصح كنت بذاكر الاختبار قبل معاد الاختبار واعدت الايام وقعدت 4 شهور بيختبروني لحد ما ف يوم قالوا النتيجه ظهرت بخش ع النت بحط رقم الملف لاقيت النتيجه غير لائق نتيجه نهائيه ... اتدمرت وعيطت وامي قعدت تهديني بس طلع ان الموقع منزل النتيجه غلط ... وبعدها بتلت ايام نايم لاقيت الفون رن برد لاقيت واحد بيقولي ان اسمك فلان الفلاني قولتله تمام قالي لائق ف كليه الشرطه نتيجه نهائيه وتعالي بكره استلم المهمات ... كانت اللحظه دي نقطه تحول ف حياتي بمعني الكلمه وعيطت م الفرحه وامي معايا بعد صبر كان طويل وتعب اطول ... وادركت ساعتها حكمه ربنا من دخولي السن واني مدخلتش بعد ثانوي وهي اني بدل ما اقعد 4 سنين وهتعب فعلا انا هقعد 6 شهور وهبقي ظابط ومش بقلل ابدا من اللي بيدخلو بعد ثانوي دول فوق راسي .. كمان دخولي السن كان عشان اتعرف علي خطيبتي هناك .. اللي عايز اقوله خلو حلمكم قدامك ومتخافوش موت نفسك عشان تحقق حلمك ده