كلية الشرطة - اختبار الطبي متخصصين شرطه ذكور

الطبى
------------------------
هتروح تقعد فى مكان كدة لحد ما الدكاترة كلهم يجوا ويجهزوا بعد كدة خدمة الطلبة هتقسمكوا على مجاميع كل مجموعة 20 طالب تقريباااا

هيبقى معاهم امين شرطة او واحد من الكلية مسئول عن المجموعة او طالب من طلبة الكليه دة من اول اختبار لحد اخر اختبااار

كل واحد يحفظ رقم المجموعة بتاعتة ورقمة كام فى المجموعة علشان ميتوهش

هيخدكوا ورا بعض وتطلعوا تقلعوا هدومكوا وهتختبروا بالبطاقة بس

هتروحوا قدام ظابط يشوف البطاقة واسمكوا وبعد كدة تروحوا تكشفوا الطبى مجموعة مجموعة

الكشوفات :

جراحة وعظام ورمد وجلديه الانف والاذن والحنجره وبياخدوا منك عينة دم والكشف العام

شرح العيادات

عياده الانف والاذن والحنجره : 

الدكتور بيبص في الاذن لو الطبله مخرومه او كده والانف لو فيه اعوجاج في الحاجز الانفي ولو فيه حاجه من دول حاول تعالجهم قبل التقديم

وملحوظه لازم تكون غاسل ودانك عند دكتور قبل متروح الكشف

عياده الاسنان : 

ودي سهله برضو بيشوف الفكين متطابقين ولا لا وبيشوف الدروس لو بايظين

عياده الجراحه : 

بتدخل علي الدكتور وتنزل اللبس وبيمسك الخصيتين وبيخليك تكح عشان يشوف فيه دوالي ولا لا وبعد كده بتلف وتوطي وبيشوف فيه عمليات بواسير او عمليات تانيه

عيادات الرمد : 

ودي بتقيس النظر عباره عن لوحه فيها دواير بتقف علي مسافه معينه والعسكري بيشاور علي علامه وانت بتقول مفتوحه في انهي اتجاه

عياده العظام : 

ودي من اصعب العيادات اللي كتير بيسقط فيها بتدخل تقف سبعه بيشوف شكل الجسم لو مش متناسق بيطلعك من قبل ما الكشف يبدأ وبعد كده بيشوف التقوس واللتصاق الفخدين وتراكب الركب وعدم تناسق الفقرات وهيخليك تعمل 3ضغطات وياريت تركزو في الكشف ده

عياده الجلديه : 

بتدخل العياده والدكتور بيشوف عرق الايدين اللي عندو املاح كتير بيخرج وبعد كده بيشوف حب الشباب لو كتير هتسقط وبعد كده بيشوف لو فيه غرز او تعاوير لو فيه بشكل كبير بتخرج وبيشوف الحروق والوحمات لو فيه باينين اوي بتخرج

الموضوع مش بياخد اكتر من ساعه او سعتين للمجموعة ان شاء الله ومفيش كشف بالترتيب يعنى حسب م الامين او الطالب اللى معاكوا يدخلكوا

والكشف العام دة بيبقى عبارة انى لواء او عقيد ومعاة ناس تانية بيشوفوا شكلك العام فية حاجة ولا ولا والصح انهم بيشوفوا الطلبة اللى سقطوا فى حاجة اثناء الكشوفات وبيتاكدوا اذا كان الكشف دة بيسقط فعلا ولا لا

يعنى لو سقطت فى حاجة عبيطة وانت بتكشف ممكن الكشف العام دة يعديك منها لو عادية مش هتاثر عليك
وبعد كدة تلبسوا وتروحوا

الطبى النفسى فى كلية الشرطة

انت هتروح تفضل هناك لحد ما الدكتور يجى وبعد كدة هيقولوا اللى اسمهم اولة حرف كذا يجى هنا او هينادوا على الاسامى اللى فى الكشف حسب ما عايزين هما

بعد كدة هتروح تراجع اسمك وتدخل تمتحن طبى نفسى

هتقعد كدة فى فصل وتستلم ورقة هتجاوبها

الوقت هيكون براحتك ان شاء الله بس مش اوى يعنى

الاسئلة كلها اسئلة نفسية وشخصية يعنى خاصة بيك ( علشان محدش يقولى ممكن نموذج للاسئلة دة )

انا مش فاكر هما كام سؤال بالظبط بس تقريبا 40 والاجابات كلها يا اما بنعم او لا او ربما بس مش اكتر

وسؤال رياضة ذكى كدة وتكتب حكمة من دماغك وتشرح معناها بس كدة

بعد كدة بترجع تقعد تانى فى مكان ويا اما بينادوا على اسمك وبتاخد كارت التردد وتروح تستنى النتيجة

يا اما بتفضل قاعد لحد ما ينادوا على اسمك علشان تدخل للدكتور وهتقعد مع الدكتور

فى دكتور هيبقى كويس هيتكلم معاك براحة خالص وهيحاول يدرس حالتك عن طريق اجابتك على كام سؤال كدة

وفى دكتور هتلاقية رخم بيحاول يستفذك اوووى علشان يعرف اخرك اية بس

وبعد كدة بتروح البيت وبتستنى النتيجة ع النت ومفيش ميعاد معين لظهور النتيجة

اليوم دة هيبقى طويل اوى اوى اوى فا اللى اهلة هيكون معاة احسن انة يخليهم يروحوا ويجوا لما انت تخلص لانك هتقعد فترة طويلة جوة

اللى بيدخل للدكتور دة بيبقى مثلا فى ورقتة حاجة الدكتور حابب يسئلة عليها كدة يعنى

ومفيش حاجة اسمها اجابتى صح ولا غلط دة شغل طب نفسى يعنى لو دخلت للدكتور مش معنى كدة انك سقط فى الامتحان